Devi Narayaniyam Dasakam -23
rambhasya putrō mahiṣāsuraḥ prāk
tīvraistapōbhirdruhiṇātprasannāt |
avadhyatāṁ pumbhiravāpya dhr̥ṣṭō
na mē mr̥tiḥ syāditi ca vyacintīt || 23-1 ||
sa cikṣurādyairasuraiḥ samētaḥ
śakrādidēvānyudhi padmajaṁ ca |
rudraṁ ca viṣṇuṁ ca vijitya nākē
vasan balādyajñahavirjahāra || 23-2 ||
ciraṁ bhr̥śaṁ daityanipīḍitāstē
dēvāḥ samaṁ padmajaśaṅkarābhyām |
hariṁ samētyāsuradauṣṭyamūcū-
-stvāṁ saṁsmaran dēvi murārirāha || 23-3 ||
surā vayaṁ tēna raṇē:’tighōrē
parājitā daityavarō baliṣṭhaḥ |
mattō bhr̥śaṁ pumbhiravadhyabhāvā-
-nna naḥ striyō yuddhavicakṣaṇāśca || 23-4 ||
tējōbhirēkā bhavatīha naścē-
-tsaivāsurānbhīmabalānnihantā |
yathā bhavatyētadaraṁ tathaiva
samprārthayāmō:’vatu nō mahēśī || 23-5 ||
ēvaṁ harau vaktari padmajātā-
-ttējō:’bhavadrājasaraktavarṇam |
śivādabhūttāmasaraupyavarṇaṁ
nīlaprabhaṁ sāttvikamacyutācca || 23-6 ||
tējāṁsyabhūvanvividhāni śakra-
-mukhāmarēbhyō miṣatō:’khilasya |
samyōgatastānyacirēṇa mātaḥ
strīrūpamaṣṭādaśahastamāpuḥ || 23-7 ||
tattu tvamāsīḥ śubhadē mahāla-
-kṣmyākhyā jaganmōhanamōhanāṅgī |
tvaṁ hyēva bhaktābhayadānadakṣā
bhaktadruhāṁ bhītikarī ca dēvi || 23-8 ||
sadyastvamuccaiścakr̥ṣē:’ṭ-ṭahāsaṁ
surāḥ prahr̥ṣṭā vasudhā cakampē |
cukṣōbha sindhurgirayō vicēlu-
-rdaityaśca mattō mahiṣaścukōpa || 23-9 ||
tvāṁ sundarīṁ cāramukhātsa daityō
vijñāya kāmī visasarja dūtam |
sa cēśvarīṁ daityaguṇān pravaktā
tvāṁ nētukāmō viphalōdyamō:’bhūt || 23-10 ||
pralōbhanaistvāmatha dēvaśaktiṁ
jñātvā:’pi vākyairanunētukāmaḥ |
ēkaikaśaḥ prēṣayatisma dūtān
tvāṁ kāminīṁ kartumimē na śēkuḥ || 23-11 ||
avēhi māṁ pucchaviṣāṇahīnaṁ
bhāraṁ vahantaṁ mahiṣaṁ dvipādam |
hiṁsanti māṁ svarthijanāstvamēva
rakṣākarī mē śubhadē namastē || 23-12 ||
